Caroline Loves Travel 貪玩辣車車: 【香港 ‧ 西貢行山路線攻略】西貢嶂上郊遊徑、許林士多柴火山水豆腐花

Tuesday, 17 March 2020

【香港 ‧ 西貢行山路線攻略】西貢嶂上郊遊徑、許林士多柴火山水豆腐花

香港有靚景又唔難行的行山路線

新型冠狀病毒肺炎（Coronavirus COVID-19) 全球蔓延，抗疫時期，由農曆新年開始減少社交活動，學校停課、返工既上班族就在家工作（Work From Home），不過困在家耐咗，周末放假唔想留喺屋企，大家都衝去郊外希望可以做吓運動呼吸新鮮空氣，於是興起「行山抗疫」風，不過受行山新手歡迎有靚景的「龍脊」及「屯門大欖涌水塘千島湖」等5大熱門行山路線，人山人海程度比市區商場戲院還要人多，想避開人潮，其實還有好多有靚景又唔難行的行山路線可以選擇，入圍既包括西貢「嶂上郊遊徑」，高原上還可以食到嶂上名物柴火「山水豆腐花」。

三百多米高嶂上高原、亦是熱門露營地

西貢「嶂上郊遊徑」走上三百多米高的嶂上高原，屬多條行山路線的交滙點，東往北潭凹，南往大網仔，西往水浪窩，北往榕樹澳，嶂上亦是熱門的露營地點。起點位於西貢北潭涌沿北潭路再入，建議由近「猴塘溪」的海下路作起點，並以北潭凹作終點，以這方向路線讓尾段變成下山梯級，令難度會調低點。【即睇我既YouTube影片．自駕．行山．露營】

西貢「嶂上郊遊徑」前往方法

前往方法可由西貢市中心乘搭7號前往「海下」綠色小巴或94號前往「黃石碼頭」九巴巴士，又或者由港鐵鑽石山站乘搭96R前往「黃石碼頭」九巴巴士（96R巴士只於周日、假日及公眾假期提供服務），於「猴塘溪」下車，走回頭約8分鐘左右便是西貢「嶂上郊遊徑」海下路入口。

西貢大網仔「利昌士多」泊車，食碗餐蛋麵加凍奶茶早餐

若好似我地今次揸車前往的話，可於大網仔「利昌士多」泊車，食碗餐蛋公仔麵加杯凍奶茶作早餐才出發（另一西貢行山泊車停車場選擇是西貢北潭涌停車埸），然後坐的士、或94/96R號巴士、7號綠色小巴前往海下路「嶂上郊遊徑」起點入口，不過最近太多人揸車去郊外既關係，除非一早出發，否則都好難揾到泊車位，而且好多放肆既違泊、警察抄牌亦好出力，所以最好還是乘搭交通公具。

三十多年老字號「許林士多」正宗柴火山水豆腐花

西貢「嶂上郊遊徑」全長約7km，需時約三個半小時，全程有路標路牌指示，山徑和石級易行，由海下路入口出發，大約一小多左右登上嶂上高原，於山上三十多年老字號「許林士多」食碗正宗柴火山水豆腐花、地道餐蛋麵、香草麥米綠豆沙。豆腐花只賣十二蚊碗，嶂上「許林士多」逢周末及周日營業。

然後沿麥理浩徑第3段走向北潭凹方向，登上「牛耳石山」，可望見大灘海、滘西洲高爾夫球場、塔門、西貢海及糧船灣海旁島嶼靚景。接著是一直下山石級，返回「北潭凹」作終點，這裹較多交通選擇，可乘搭綠色小巴或巴士返回西貢或鑽石山。