Caroline Loves Travel 貪玩辣車車: 【香港 ‧ 自駕遊好去處】西貢海下灣獨木舟一日遊全攻略 🚗

Saturday, 7 November 2020

【香港 ‧ 自駕遊好去處】西貢海下灣獨木舟一日遊全攻略 🚗

實在好鍾意玩kayak獨木舟既闗係，十月中，捉緊夏天的尾巴，襯住仲好晒好熱既星期五，特登請咗假，因實在很怕周末的恐怖人潮，今次㨂咗西貢海下灣作為獨木舟一日遊，真係好好玩，絕對玩上癮，教埋你西貢海下停車場免費泊車方法。【即睇我既YouTube影片．自駕．行山．露營】

西貢獨木舟租借

喺香港既夏天要玩kayak獨木舟，地點選擇不少，無論係西貢(Sai Kung)又或者係赤柱（Stanley）都有獨木舟租借，獨木舟初哥當然最好先㨂海灣地形的地點，沒有太大風浪或其他船隻，而西貢海下灣是不錯選擇，上網揾有關西貢獨木舟租借資料的話，好容易先揾到西貢海下灣「好景茶座」，我們這次也是經西貢海下灣「好景茶座」租借獨木舟，不過體驗過海下灣「好景茶座」有性格經營手法~~，再者實地考察過後，其實就係喺隔離的西貢海下灣既「海下雲海(發記)士多」更值得推介，據聞服務更貼心及有温度。~~

西貢海下灣「好景茶座」vs「海下雲海 (發記) 士多」

西貢海下灣「好景茶座」獨木舟租借，獨木舟日租每隻HK$100（包Life Jacket），然後好似每樣野都會收費。當然西貢海下灣「好景茶座」有簡單郊區士多都會有既的餐腸等公仔麵的食物，然而海下灣「好景茶座」既HK$140海膽炒飯，常被形容為海水炒飯，即係無海膽、食唔到海膽！「海下雲海(發記)士多」好似只賣飲品，獨木舟及其他水上活動用品租借。

⚠️ ⚠️ （2022年6月更新：最近再次實試西貢海下灣「好景茶座」及「海下雲海(發記)士多」租借獨木舟，老實說海下灣「好景茶座」服務唔算合理，老闆和老闆娘有性格經營手法，每次總會令人條氣唔多順；然而，另一間「海下雲海(發記)士多」服務及收費更差！除咗預約要預付按金，預約時說好的價錢，到當日到場取獨木舟時，更會坐地起價！而且海下灣「海下雲海 (發記) 士多」位置並唔係沙灘位置，上落獨木舟唔係好方便，而老闆及職員只會收錢，唔會幫租用既客人安排上落獨木舟，若對玩獨木舟新手或會帶同小朋友一齊來玩既，應該幾唔安全，甚至有危險 🚨。再者，「海下雲海(發記)士多」所提供既獨木舟及救生衣較舊，污穢和破爛，有小昆蟲喺上面爬行。）

西貢海下灣獨木舟體驗

西貢海下灣算係內灣，地理環境合適獨木舟，特別初學者，無乜太䌓忙的海上交通，也沒有太大風浪，當然若天氣唔好時，就任何地方都不適合水上活動。坐上獨木舟，由西貢海下灣出發，可以靠左去左邊的幾個小島，當中有些無人小島可以上岸嘆吓，如果有帶食物，可以食埋個午餐，記得帶走垃圾。而如果由西貢海下灣出發向右，可到「賽馬會匯豐世界自然(香港)基金會海下灣海洋生物中心（Hoi Ha Marine Centre）」，及西貢灣仔。以及日式竹林庭院「海下遊客中心」。

獨木舟裝備

由於依家租借既獨木舟設計都唔容易翻艇，所以除非打算游水，否則都唔一定要著泳衣，不過獨木舟裝備，必定要著厚底鞋，因為要上無人島，通常都係要好多石，手套都可以考慮，主要係握槳無咁傷手。另外一定要帶手機防水袋，因為手機拿出拿入影相好大機會會入水。戶外活動帶水及少少充饑乾量是常識吧！亦一定一定要搽防晒，因為唔覺唔覺好容易晒傷或兩層色。

西貢海下灣泊車停車場

西貢海下灣獨木舟泊車，打電話跟「好景茶座」或「海下雲海(發記)士多」士多預約好，俾埋車牌資料，揸車到達西貢北潭涌，先於西貢大網仔路「西貢郊野公園遊客中心」登記好西貢郊野公園北潭涌關閘一日臨時通行證，便可 🚗 揸車進入，西貢海下灣係要某路口轉左，否則會去西貢西灣亭或者萬宜水庫。🅿️ 西貢海下灣的停車場唔太，而且都係村民優先用，~~村民或士多都會要求車泊在村外的迴旋處位置，由於西貢北潭涌閘口已控制人流，所以就算算係非法泊車，抄牌機會相對較低~~（⚠️ ⚠️ 2022年5月更新：最近再去海下灣扒獨木舟，發現海下灣村外的迴旋處位置泊車都會被抄牌了。西貢北潭涌停車場部分雖被長期泊車佔用，部分車亦因此揾唔到位泊車而被迫泊喺旁邊既非泊車位位置，最後都被抄牌。）另外可以考慮西貢「北潭涌停車場」免費或咪錶泊車位置，星期五朝早十點多都有車位，星期日及公眾假期朝早9點前都要等一陣才會有泊車位。由北潭涌到海下灣，就要再轉7號綠色專線小巴（由北潭涌村往海下$7.4；全程收費，即由西貢碼頭開出經大網仔、北潭涌、麥理浩夫人度假村、白沙澳：$13.1。班次：平日每30分鐘；星期日及公眾假期每20分鐘）或HK$70綠色新界的士前往西貢海下灣。

西貢北潭涌泊車停車場｜西貢郊野公園遊客中心泊車

（⚠️ ⚠️ 2022年6月更新：西貢北潭涌停車場最近改成咪錶🅿️只得4小時泊車！對真正去戶外行山及水上活動既人極唔方便‼️🤦🏽 【即睇㊙️香港自駕 YouTube影片介紹．西貢郊遊：北潭涌泊車】

或者呢個都算係「沒有最蠢，只有更蠢！」out-stupid既完美演繹。以前部分郊區停車場，如北潭涌、大尾督、大網仔、石澳等都是免費泊車停車場，無須入錶及俾錢付費泊車，方便戶外活動，露營及水上活動真正用家，可以到戶外及山上玩一天至數天。

然後，呢D免費泊車位給長期佔用，部分車都鋪滿塵及樹葉 🍂，一看就知都已經喺同一位置泊咗唔短既時間，真正嚟郊外遊既用家經已幾難揾到位泊車，如果無法泊到指定合法泊車位，最後只能預備好收硬牛肉乾，反而長期霸佔泊車位就無事。【即睇㊙️香港自駕 YouTube影片介紹．西貢郊遊：北潭涌泊車】

其實，好多外國地方都會用好簡單方法，就能阻止政府合法泊車位長期被佔用，無論係咪錶、還是免費泊車位，就係執法人員會喺車呔留記號，咁就好容易知道架車喺同一位置泊左有幾耐，如果超過指定時間，同樣會收牛肉乾，咁樣應該相對能讓設施公平使用吧。

然而依家西貢北潭涌停車場改成咪錶，令真正去戶外行山及水上活動既停車場用家最多只得4小時泊車！老實說，真的極唔方便！如果4小時後無法趕回去取車，都係會收牛肉乾罰款HK$320既話，咁那4小時泊車係咪仲應該入錶呢？又或者唔知會唔會有好似西貢白沙灣停車場那邊有「代客入錶」既商機呢？）【即睇我既YouTube影片．自駕．行山．露營】

香港 ‧ 自駕遊好去處：